SA ATON NGA pag sug-alaw sang Bag-ong Tuig 2022, gabay nga mangibabaw sa aton selebrasyon ang paghatag sang pagdayaw kag pagpasalamat sa aton Ginoong Diyos sa tanan nga bugay kag grasya nga aton nabaton sa bilog nga tuig. Sa tunga sang mga pagpanghangkat kag mga pagtilaw, kabudlayan, kasubo kag kalipay, nagpabilin kita nga mabakod, maisog kag mapag-on. Nangin nag madinalag-on kita sa pag atubang sa mga ini bangud man sang aton pagsalig kag pagtuo sa Iya. Gabay nga mas mapabakod pa naton ang aton pagtuo kag magapabilin nga nagadabdab ang aton mga tagipusuon sang pagpalangga kag pag ulikid, indi lamang sa aton tagsa ka nga panimalay kundi para sa aton isig kapareho.

Gani sa sini nga Bag ong Tuig, 2022, sa gihapon, aton nga padayunon ang aton pag isa kag pagbinuligay agud sa liwat mangin madinalag on Kita sa pag atubang sang ano man nga mga pagtilaw kag kabudlayan.

Ang #Gwapongasrbisyo padayun sa gihapon nga magahatag sang tampad, matuod tuod kag mas pinaayo nga serbisyo sa tanan nga Talisaynon. Ini magapadayun sa pag patuman sang mga programa kag proyekto para sa kaayuhan sang tanan kag kauswagan sang aton pinalangga nga Syudad sang Talisay.

Upod sang akon pinalangga nga pamilya kag bug os ko nga panimalay, ako nagatamyaw sa tanan sang Happy New year! Gabay nga Kita tanan padayun nga ubayan kag protektahan sang aton Ginoong Diyos subong kag sa matag adlaw nga tanan.